Shahrukh Khan : बॉलीवूडचा बादशाह शाहरुख खानने नुकताच त्याचा 59 वा वाढदिवस साजरा केला. लाखो चाहत्यांनी शुभेच्छा दिल्या, त्याच्या घरासमोरची गर्दी वाढली, पण सुरक्षेच्या कारणास्तव यंदा शाहरुखने मन्नतच्या बाल्कनीवर येऊन चाहत्यांना त्याची झलक दाखवली नाही. तरीही त्याचा एक चाहता सोशल मीडियावर चर्चेत आला, कारण त्याने तब्बल 95 दिवस मन्नतबाहेर तळ ठोकला होता, फक्त शाहरुखला एकदाच भेटण्यासाठी. त्याचं समर्पण पाहून अखेर शाहरुखने या चाहत्याची भेट घेतली आणि त्याला दिलेलं गिफ्ट त्याच्या चाहत्यांना खास वाटलं.
मन्नतवर भेटलेल्या या चाहत्याचं नाव शेर मोहम्मद आहे. शेरने सांगितलं की, “शाहरुखने विचारलं, ‘काही हवंय का? प्रवासासाठी खर्चाची गरज आहे का?’ आणि त्यानंतर त्याने मला 10,000 रुपये दिले, शिवाय माझ्या गाडीमध्ये 4700 रुपयांचं पेट्रोल भरून दिलं.” शेर मोहम्मदच्या मते, शाहरुख खानने त्याला एकूण 14,700 रुपयांची मदत केली आणि मन्नतवर त्याचं स्वागत केलं. शाहरुखने त्याला पाणी, खायला पदार्थ दिले, इतकंच नव्हे, तर त्याच्या गाडीमध्येही खाण्याचे पदार्थ ठेवून दिले. हा अनुभव सांगताना शेर मोहम्मद म्हणतो की, शाहरुख खरंच लोकांच्या प्रेमाची आणि समर्पणाची किंमत जाणणारा स्टार आहे.
फॅन आणि स्टारमधील असा हा जवळीक साधणारा प्रसंग अनेकांच्या मनाला भिडला आहे. शाहरुख खान हा केवळ एक सुपरस्टार नाही तर एक संवेदनशील माणूस आहे, जो त्याच्या चाहत्यांवर अपार प्रेम करतो. त्याच्या वाढदिवशी साजरा करण्यात आलेला हा छोटासा क्षण सोशल मीडियावर व्हायरल झाला आणि अनेकांनी त्याच्या या कृतीचं कौतुक केलं.
याच भेटीत शेर मोहम्मदने आर्यन खानच्या पदार्पणाविषयी एक विशेष अपडेट दिली. शेरने स्वत: लिहिलेल्या एका स्क्रिप्टची कल्पना शाहरुखसमोर मांडली होती, जी त्याला आर्यनसाठी योग्य वाटली होती. पण त्यावर शाहरुखने सांगितलं की, “मी आर्यनसाठी आधीच एक स्क्रिप्ट लिहिली आहे.” या स्क्रिप्टवर काम पूर्ण झाल्यावर ‘किंग’ हा शाहरुखचा आगामी चित्रपट प्रदर्शित झाल्यावर आर्यन खानचा चित्रपट प्रदर्शित होईल, अशी शाहरुखने माहिती दिली. त्यात आणखी एक चमत्कारिक गोष्ट म्हणजे, आर्यन खानसोबत या चित्रपटात अभिनेत्री सारा अली खान झळकणार आहे. दोघांचे एकत्र काम चाहत्यांसाठी एक अद्भुत अनुभव असणार आहे.
वर्क फ्रंटबद्दल बोलायचे झाले तर शाहरुख खानचा शेवटचा चित्रपट ‘डंकी’ होता, ज्यात त्याने त्याच्या अभिनयाने चाहत्यांना मंत्रमुग्ध केलं होतं. आता तो त्याच्या आगामी ‘किंग’ या चित्रपटात दिसणार आहे. याच चित्रपटाच्या निमित्ताने शाहरुखची मुलगी, सुहाना खानही चित्रपटसृष्टीत पदार्पण करणार आहे, ज्यासाठी तिच्या चाहत्यांमध्येही प्रचंड उत्सुकता आहे.
शाहरुख खान हा केवळ अभिनेता नसून, तो एक प्रेरणादायी व्यक्तिमत्व आहे. त्याच्या चाहत्यांसोबतच्या अनोख्या नात्यामुळे तो नेहमी चर्चेत राहतो. त्याच्यासोबतची भेट असो किंवा त्याच्या जीवनातील प्रसंग, त्याच्या चाहत्यांसाठी ते नेहमीच खास असतात. यावेळेस त्याने चाहत्याला दिलेलं गिफ्ट आणि आर्यनच्या पदार्पणाविषयी दिलेली माहिती सर्वांच्याच मनाला आनंद देणारी आहे.
