Nagraj Manjule : मराठी सिनेसृष्टीचे सुप्रसिद्ध दिग्दर्शक नागराज मंजुळे यांनी त्यांच्या अष्टपैलू सिनेमांमुळे रसिकांच्या मनात वेगळं स्थान निर्माण केलं आहे. फॅन्ड्री, सैराट, झुंड यांसारखे दमदार चित्रपट देत मराठी सिनेमाला नवी ओळख देणाऱ्या मंजुळे यांची चाहत्यांमध्ये विशेष क्रेझ आहे. मात्र, नुकत्याच जाहीर झालेल्या खाशाबा जाधव यांच्या जीवनावर आधारित चित्रपटामुळे नागराज मंजुळे एका वादाच्या भोवऱ्यात अडकले आहेत.
Nagraj Manjule
खाशाबा जाधव चित्रपटाच्या कथेसंदर्भातील वाद
मिळालेल्या माहितीनुसार, खाशाबा जाधव यांच्या चरित्रावर आधारित हा चित्रपट निर्मितीच्या प्रक्रियेत असताना, मूळ कथा लेखक संजय दुधाणे यांनी या चित्रपटाची कथा स्वतःची असल्याचा दावा केला आहे. त्यांनी सांगितले की, खाशाबा जाधव यांच्या चरित्र पुस्तकाचे सर्व हक्क 2001 पासून त्यांच्या नावावर आहेत. इतकंच नव्हे, तर कॉपीराईट प्रमाणपत्र देखील त्यांच्या नावावर असल्याचा पुरावा त्यांनी दिला आहे.
Nagraj Manjule
कोर्टात कायदेशीर दावा दाखल
या वादामुळे संजय दुधाणे यांनी दिग्दर्शक नागराज मंजुळे, जिओ स्टुडिओ, आटपाट प्रोडक्शन, आणि निर्माती ज्योती देशपांडे यांच्याविरोधात पुणे जिल्हा व सत्र न्यायालयात दावा दाखल केला आहे. या प्रकरणासाठी अ‍ॅड. रविंद्र शिंदे आणि अ‍ॅड. सुवर्णा शिंदे यांच्यामार्फत दुधाणे यांनी सिनेमाच्या निर्मिती आणि प्रदर्शनावर तातडीने बंदी आणण्यासाठी न्यायालयात याचिका केली आहे.
Nagraj Manjule
नागराज मंजुळे यांना न्यायालयाचे समन्स
न्यायालयाने यासंदर्भात नागराज मंजुळे आणि निर्माती ज्योती देशपांडे यांना समन्स पाठवले असून, त्यांना वैयक्तिकरित्या हजर राहण्याचे आदेश दिले आहेत. या प्रकरणाचे पुढील निकाल काय होणार याकडे आता सर्वांचे लक्ष लागले आहे.
नागराज मंजुळे: यशाची कहाणी
नागराज मंजुळे हे मराठी सिनेसृष्टीतील असे नाव आहे, ज्यांनी त्यांच्या कलेच्या जोरावर संपूर्ण देशात मराठी सिनेमाची ओळख निर्माण केली. एका सामान्य घरातून आलेल्या नागराज यांनी प्रचंड संघर्ष केला आणि आपल्या चित्रपटांतून सामाजिक समस्या आणि मानवी भावनांना मांडणारा एक वेगळा दृष्टिकोन सादर केला.
त्यांनी फॅन्ड्री या पहिल्याच चित्रपटातून जातीयता आणि सामाजिक विषमता यांसारख्या संवेदनशील विषयांना वाचा फोडली. यानंतर आलेल्या सैराट चित्रपटाने तर इतिहास घडवला. ग्रामीण महाराष्ट्रातील एक प्रेमकथा असलेल्या सैराटने जगभरात मराठी सिनेमा पोहोचवला. तसेच, झुंड चित्रपटाने नागराज यांचे नाव बॉलीवूडमध्येही पोहोचवले.
सध्याच्या वादावर परिणाम?
नागराज मंजुळे यांचे नाव मराठी चित्रपट क्षेत्रात एक आदर्श म्हणून घेतले जाते. मात्र, हा वाद त्यांच्या सर्जनशीलतेला गालबोट लावतो का, हे पाहणे महत्त्वाचे ठरणार आहे. एका बाजूला संजय दुधाणे यांचा कॉपीराईटबाबतचा दावा आणि दुसरीकडे नागराज यांची दिग्दर्शन कौशल्ये यामुळे प्रेक्षकांच्या मनात या प्रकरणाविषयी मोठी उत्सुकता आहे.
