Vidhansabha election 2024 : विधानसभा निवडणुकीच्या पार्श्वभूमीवर महाविकास आघाडी आणि महायुतीमधील उमेदवारांच्या याद्या टप्प्या-टप्प्यात जाहीर होत आहेत. जागावाटपाचा तिढा सोडवताना काही नवीन उमेदवारांना संधी देण्यात येत आहे, तर काही विद्यमान आमदारांचा पत्ता कट होत आहे. अशाच प्रकारे, अजित पवारांच्या राष्ट्रवादी काँग्रेस गटाचे विद्यमान आमदार देवेंद्र भुयार यांचे तिकीट या निवडणुकीत रद्द करण्यात आले आहे. या निर्णयामागे महिलांबद्दल केलेले एक वादग्रस्त विधान कारणीभूत असल्याचे सांगितले जात आहे.
भुयार हे वरुड-मोर्शी मतदारसंघातून विद्यमान आमदार असून, त्यांना पक्षाने तिकीट नाकारल्याने आता ते अपक्ष म्हणून निवडणुकीत उतरण्याची तयारी करत आहेत. हा निर्णय त्यांच्या राजकीय भविष्यावर प्रभाव टाकणारा ठरला आहे. विशेष म्हणजे भुयार हे उपमुख्यमंत्री अजित पवारांचे विश्वासू सहकारी मानले जात होते. मात्र, त्यांनी काही दिवसांपूर्वी केलेल्या एका विधानामुळे पक्षाने त्यांना दूर करण्याचा निर्णय घेतला, असे सांगितले जात आहे.
ऑक्टोबर महिन्याच्या सुरुवातीलाच, भुयार यांनी जाहीर सभेत मुलींच्या दिसण्याबद्दल केलेल्या विधानामुळे नव्या वादाला सुरुवात झाली होती. त्यांच्या या विधानावर विरोधकांनी चौफेर टीका केली, तर समाजातील अनेकांनी त्यांच्या विधानावर नाराजी व्यक्त केली. एका जाहीर सभेतील भुयार यांच्या भाषणाचा व्हिडीओ व्हायरल झाला होता, ज्यामध्ये त्यांनी लग्नासाठी मुलींच्या सुंदरतेवर आणि मुलाच्या आर्थिक स्थितीवर भाष्य केले होते.
त्यांच्या विधानानुसार, “लग्नाला मुलगी हवी असेल तर मुलगा नोकरीवाला पाहिजे. पोरगी स्मार्ट असेल, सुंदर असेल तर ती तुमच्या माझ्यासारख्या पोरांना भेटत नाही. ती नोकरीवाल्यांना भेटते. दोन नंबरची पोरगी कोणाला तर ज्यांचा पानठेला, धंदा, दुकान आहे त्यांना! तीन नंबरची गाळ राहिलेली पोरगी शेतकऱ्याच्या पोरांना भेटते. शेतकऱ्यांच्या पोरांचं काही खरं राहिले नाही,” असे विधान त्यांनी केले होते. या विधानानंतर भुयार यांच्यावर सामाजिक आणि राजकीय स्तरावर टीकेची लाट उसळली होती.
वाद निर्माण झाल्यानंतर, भुयार यांनी स्पष्टीकरण देत म्हटले की, हे विधान 2019 मध्ये मध्य प्रदेशात झालेल्या एका कार्यक्रमात केले होते. त्यांच्या म्हणण्यानुसार, त्या वेळी मुलांना लग्नासाठी मुली मिळत नसल्याने त्यांनी त्या परिस्थितीचा उल्लेख केला होता. त्यांनी महिलांचा किंवा मुलींचा अपमान करण्याचा कोणताही हेतू नव्हता, असे त्यांनी स्पष्ट केले. मात्र, या स्पष्टीकरणामुळे वाद मिटला नाही आणि अखेर या विधानामुळेच भुयार यांना तिकीट मिळणार नसल्याचे स्पष्ट झाले.
टिकिट रद्द झाल्यानंतर देवेंद्र भुयार आता वरुड-मोर्शी मतदारसंघातून अपक्ष उमेदवार म्हणून निवडणूक लढवणार आहेत. त्यांच्या सोशल मीडिया पोस्टरवरूनही अजित पवार आणि घड्याळ चिन्हाचे उल्लेख गायब झाल्याचे दिसून आले आहे, ज्यामुळे ते आता स्वतंत्रपणे आपले राजकीय अस्तित्व टिकवण्यासाठी तयारी करत आहेत.
अजित पवार गटाने महिलांबद्दल संवेदनशीलता दाखवून त्यांच्या विधानांचे वर्तनही कठोरपणे तपासण्याची गरज असल्याचे यामधून सूचित केले आहे. महिलांच्या सन्मानासाठी उचललेले हे पाऊल समाजात सकारात्मक संदेश पोहोचवण्याचा प्रयत्न असल्याचे दिसते.
