Laxman Hake : विधानसभा निवडणुकीत महायुतीने जोरदार यश मिळवत तिन्ही पक्षांच्या उमेदवारांचा मोठा विजय साजरा केला आहे. या निकालानंतर आता मुख्यमंत्री कोण होणार, याकडे राज्याच्या जनतेचं लक्ष लागलं आहे. महायुतीच्या विजयामध्ये ‘मुख्यमंत्री लाडकी बहीण’ योजना आणि ओबीसी फॅक्टर या दोन घटकांनी मोठी भूमिका बजावली आहे.
Laxman Hake
Lakshman Hake
ओबीसी फॅक्टरचा निर्णायक प्रभाव
मराठा आरक्षणासाठी लढणारे मनोज जरांगे पाटील यांनी निवडणुकीतून माघार घेतल्यानंतर ओबीसी नेते लक्ष्मण हाके यांनी महायुतीच्या उमेदवारांसाठी राज्यभर सभा घेतल्या. या मोहिमेमुळे ओबीसी समाज महायुतीच्या बाजूने ठामपणे उभा राहिला, असं लक्ष्मण हाके यांनी पत्रकार परिषदेत सांगितलं. त्यांनी दावा केला की, ओबीसी मतदारांच्या पाठिंब्यामुळे महायुतीला हा मोठा विजय मिळवता आला आहे.
Laxman Hake
Lakshman Hake
‘सुपारी’ वादावर हाके यांचा पलटवार
महाविकास आघाडीने हाके यांच्यावर “महायुतीसाठी सुपारी घेतली” असा आरोप केला होता. या आरोपांवर उत्तर देताना लक्ष्मण हाके म्हणाले,
“हो, मी सुपारी घेतली होती, पण ती ओबीसींच्या हक्कांसाठीची होती. ओबीसी समाजासाठी न्याय मिळवून देणं, त्यांच्या हिताचं सरकार स्थापणं हे माझं उद्दिष्ट होतं. शरद पवार, राजेश टोपे आणि रोहित पवार यांना पराभूत करण्याची सुपारी मी घेतली होती, आणि ती यशस्वीपणे पूर्णही केली.”
Laxman Hake
Lakshman Hake
जरांगे पाटलांवर टीका
जरांगे पाटील यांचा उल्लेख करताना हाके म्हणाले,
“जरांगे म्हणाले होते की, त्यांनी गनिमी कावा वापरून उमेदवार दिले नाहीत. पण, रणांगणात उतरण्याशिवाय कोणतंही युद्ध जिंकता येत नाही. केवळ निवडणूक टाळणं गनिमी कावा नसतो, तर तो फक्त सपशेल पराभव मान्य करणं आहे.”
हाके यांनी मनोज जरांगे यांच्यासह शरद पवार, राजेश टोपे आणि रोहित पवार यांच्यावरही टीकास्त्र सोडलं. त्यांनी म्हटलं की,
“आम्ही योग्य पद्धतीने रणनीती आखली आणि ओबीसी समाजाला महायुतीकडे वळवलं. त्यामुळे हवेत गेलेले काही नेते आता जमिनीवर आले आहेत.”
मंत्रिपदाची मागणी
महायुतीच्या यशानंतर लक्ष्मण हाके यांनी आपली मंत्रिपदाची मागणी स्पष्टपणे मांडली आहे.
“मला महसूल, गृह किंवा अर्थ खात्याचं कॅबिनेट मंत्रिपद दिलं गेलं पाहिजे. ओबीसी समाजाचे अनेक प्रश्न सोडवण्यासाठी ही खाती माझ्या हाती असणे महत्त्वाचं आहे. गावपातळीवरील ओबीसींच्या समस्यांसाठी मी काम करेन,” असं हाके यांनी सांगितलं.
ओबीसी फॅक्टरची ताकद
ओबीसी मतदारांचा मोठा पाठिंबा मिळाल्याचा दावा करताना हाके यांनी सांगितलं की,
“ओबीसी मतदार गावगाड्यातून महायुतीसोबत उभा राहिला आणि त्याचा परिपाक महायुतीच्या विजयात दिसून आला आहे. ओबीसींचा आवाज आता विधानसभेत अधिक बुलंद होईल, याची खात्री आहे.”
महायुतीच्या विजयानंतर आता मंत्रीमंडळ कसं असेल आणि कोणकोणती खातं कोणाला मिळतील, याकडे सर्वांचे लक्ष आहे. लक्ष्मण हाके यांची मंत्रिपदासाठीची मागणी त्यांच्या राजकीय ताकदीचा विचार करता महत्त्वाची ठरू शकते. तसेच, ओबीसी समाजासाठीचे त्यांचे उद्दिष्ट पूर्ण करण्यासाठी मंत्रिपद ही त्यांच्या यशस्वी मोहिमेची पुढील पायरी ठरू शकते.
