Shindkheda : शिंदखेडा विधानसभा मतदारसंघात आगामी निवडणुकीसाठी वातावरण चांगलेच तापले आहे.भाजपचे विद्यमान आमदार जयकुमार रावल यांच्या निकटवर्तीय मानले जाणारे कामराज निकम आता त्यांच्या विरोधात तुतारी वाजवण्याच्या तयारीत आहेत. काही महिन्यांपूर्वीच निकम यांनी भाजप सोडून राष्ट्रवादी शरद पवार पक्षात प्रवेश केला होता, आणि आता त्यांना या मतदारसंघातून तिकीट कन्फर्म झाल्याची माहिती सूत्रांकडून वर्तवली जात आहे.
कामराज निकम यांचे भाजपमधून राष्ट्रवादीत जाणे ही एक मोठी राजकीय घटना ठरली आहे. एकेकाळी रावल यांचे निकटवर्तीय असलेल्या निकम यांनी राष्ट्रवादी पक्षात प्रवेश केल्याने, शिंदखेडा मतदारसंघातील समीकरणे बदलली आहेत. आता त्यांना या मतदारसंघातून तिकीट देऊन निवडणुकीत उतरवले जाणार आहे, अशी माहिती सूत्रांकडून समोर येत आहे. सूत्रांच्या मते, त्यांना राष्ट्रवादीकडून अधिकृत ए बी फॉर्मसुद्धा लवकरच हस्तांतरित करण्यात येणार आहे, ज्यामुळे त्यांची उमेदवारी निश्चित झाल्याचे स्पष्ट संकेत मिळत आहेत.
कामराज निकम यांचा भाजपमधील प्रवास फार काळ टिकला नाही. त्यांच्या या निर्णयाने मतदारसंघात एक मोठे वळण आले असून, विरोधकांमध्ये अस्वस्थता निर्माण झाली आहे. जयकुमार रावल यांच्यासाठी हे मोठे आव्हान ठरू शकते, कारण निकम यांचा प्रभाव आणि त्यांचा जुना जनाधार त्यांच्यासोबत आहे.
राष्ट्रवादी शरद पवार पक्षाने कामराज निकम यांच्यावर विश्वास दाखवला असून, त्यांना अधिकृत उमेदवार म्हणून घोषित करण्याची तयारी सुरू आहे. पक्षाच्या स्थानिक नेतृत्वाने त्यांना संपूर्ण पाठिंबा दिला आहे, आणि निकम यांनीही आपल्या समर्थकांसोबत या निवडणुकीत ताकद दाखवण्याची तयारी केली आहे.
कामराज निकम यांचा राजकीय अनुभव, कार्यकर्त्यांमध्ये असलेली लोकप्रियता आणि स्थानिक पातळीवरील त्यांचे कार्य पाहता, त्यांचा जयकुमार रावल यांच्यासोबतचा संघर्ष अत्यंत रोमांचक ठरणार आहे. एकेकाळी जवळचे साथीदार असलेल्या या दोन नेत्यांमध्ये आता तीव्र स्पर्धा पाहायला मिळणार आहे.
शिंदखेडा मतदारसंघातील हा संघर्ष निवडणूक प्रक्रियेत मोठी उलथापालथ घडवून आणू शकतो. जयकुमार रावल यांच्यासमोर आता आपले मतदारसंघ टिकवण्यासाठी निकम यांच्या विरोधात जोरदार मोहीम राबवण्याचे आव्हान आहे. या निवडणुकीतील संघर्ष चुरशीचा होण्याची शक्यता असून, मतदारांना यंदा राजकीय नाट्याचा रंगतदार अनुभव येईल, असे दिसते.
“ज्या तालमीत जो पैलवान शिकलाय, त्या पैलवानाला सगळे डावपेच माहीत असतात,तोच पैलवान कुस्ती मारेल….” हे वाक्य शिंदखेडा विधानसभा मतदारसंघांमध्ये खरं ठरवू शकेल का. याकडे सर्वांचे लक्ष लागून आहे.
