भाजपने आपल्या पहिल्या यादीत ९९ उमेदवारांची अधिकृत घोषणा केली आहे, तर शिंदे यांच्या नेतृत्वाखालील शिवसेनेकडून ४५ उमेदवारांना तिकीट देण्यात आले आहे. मात्र, महायुतीमध्ये अजूनही १८ जागांवर मतभेद कायम असल्याचे समजते.
विधानसभा निवडणुकीच्या पार्श्वभूमीवर भारतीय जनता पक्षाने रविवारी आपल्या पहिल्या यादीची घोषणा केली, ज्यात ९९ उमेदवारांचा समावेश आहे. काल रात्री उशिरा, एकनाथ शिंदे यांच्या नेतृत्वाखालील शिवसेनेने ४५ उमेदवारांची यादी जाहीर केली. त्याचवेळी अजित पवार यांच्या गटाकडूनही काही उमेदवारांना एबी फॉर्म देण्यात आले, आणि आज राष्ट्रवादीच्या अजित पवार गटाने ३८ उमेदवारांची पहिली अधिकृत यादी जाहीर केली.महायुतीत, मात्र, काही जागांवर अजूनही मतभेद कायम असल्याचे समोर आले आहे. सध्या १८ जागांवर पेच आहे, ज्यावर अद्याप अंतिम निर्णय झालेला नाही. या मतभेदांच्या पार्श्वभूमीवर महायुती काही ठिकाणी सावध भूमिका घेत असल्याचे दिसते, विशेषतः बंडखोरी रोखण्यासाठी. काही जागांवर महायुतीचे उमेदवार जाहीर करण्यासाठी थोडा अवधी घेतला जातो आहे, कारण महाविकास आघाडीने आपला उमेदवार ठरल्यानंतरच महायुती त्यावर निर्णय घेणार असल्याचे सांगितले जात आहे.
सूत्रांच्या माहितीनुसार, अंधेरी पूर्व, चेंबूर, दिंडोशी, कलिना, वरळी, वर्सोवा, शिवडी, धारावी, मिरा भाईंदर, कोल्हापूर उत्तर, गुहागर, करमाळा, बार्शी, कोपरगाव, गंगाखेड, लोहा, बडनेरा, आणि बाळापूर या १८ जागांवर महायुतीमध्ये अजूनही पेच कायम आहे.या जागांवर निर्णय घेण्यासाठी महायुतीच्या नेत्यांकडून सतत चर्चा सुरू आहे, आणि प्रत्येक गट आपले उमेदवार जिंकून येण्याची खात्री करूनच अंतिम निर्णय घेत आहे. त्यामुळे पुढील काही दिवसांत या १८ जागांबाबत स्पष्टता येण्याची शक्यता आहे, अशी माहिती मिळत आहे.
