Bacchu kadu Acola : सध्याच्या तणावपूर्ण राजकारणात हलकेफुलके, हसरे क्षण फारच कमी अनुभवायला मिळतात, पण अलीकडेच अकोला जिल्ह्यातील मूर्तीजापूर मतदारसंघात, एका प्रचार सभेत हसरे क्षण निर्माण झाले. या प्रसंगाचे प्रमुख पात्र होते आपल्या मिश्कील शैलीसाठी ओळखले जाणारे आमदार बच्चू कडू. सभेत उपस्थित महिलांनी त्यांना “बच्चूभाऊ, तूम आगे बढो” अशी घोषणा दिली, आणि त्यावर बच्चू कडूंनी दिलेलं मिश्किल उत्तर लोकांमध्ये हास्याचे फवारे उडवून गेलं.
मूर्तीजापूर मतदारसंघातील बार्शीटाकळी येथे मंगळवारी आमदार बच्चू कडू आपल्या सहकारी उमेदवार रवी राठोड यांच्या प्रचारासाठी आले होते. या सभेतील त्यांच्या भाषणाचे वेगवेगळे मुद्दे लोकांचे लक्ष वेधून घेत होते. भाषण सुरू असताना, व्यासपीठावरील एक महिला कार्यकर्ती जोशात येऊन “बच्चूभाऊ, तूम आगे बढो” अशी घोषणा देताच बच्चू कडूंनी तिच्याकडे पाहताच हजरजबाबीपणे उत्तर दिलं, “अगं माऊले, मी आणखी आगे बढलो तर खाली पडेन!” त्यांच्या या उत्तरावर सर्वांनीच हसून टाळ्यांचा गजर केला. उपस्थितांमध्ये हास्याचं वातावरण तयार झालं, आणि थोडा काळ का होईना, लोकांचे चेहरे खुलले.
बच्चू कडू हे राजकीय भाषण करत असताना सतत मिस्कील भाषेचा वापर करतात, ज्यामुळे सामान्य लोकांशी त्यांचा संवाद खूप नैसर्गिक वाटतो. त्यांची अशा प्रकारची शैली त्यांना नेहमीच खास बनवते. त्यांचं भाषण फक्त गंभीर राजकीय मुद्द्यांवरच मर्यादित न राहता, सामाजिक प्रश्नांवरही असतं, ज्यामुळे लोक त्यांना आपलेपणाने ऐकतात.
सभेत बच्चू कडू यांनी सोयाबीनच्या अनुदानावरही स्पष्ट भाष्य केलं. त्यांनी सरकारच्या धोरणांवर टीका करत सांगितलं की, “सरकारने सोयाबीनला ७ हजार रुपये भाव जाहीर केला, पण प्रत्यक्षात शेतकऱ्यांना फक्त ५ हजार रुपये दिले जात आहेत.” या वक्तव्यावर काही लोकांनी टाळ्या वाजवल्या, पण त्यावरही बच्चू कडू संतप्त झाले. टाळ्या वाजवणाऱ्यांकडे पाहत ते म्हणाले, “आपल्यालाही खरंच लाज कशी वाटत नाही?” शेतकऱ्यांचे आणि सामान्य जनतेचे प्रश्न या गोंधळात कसे दुर्लक्षित केले जातात, हे त्यांचं बोलणं उपस्थितांना जाणवून देणारं होतं.
याशिवाय, त्यांनी मुस्लिम समाजाबद्दल एक मुद्दा उपस्थित केला की, “काँग्रेसने नेहमी मुस्लिम समाजाचा फक्त वापर केला आहे. पण अजूनही मुस्लिम काँग्रेसला का मतदान करतात?” त्यांच्या या प्रश्नाने उपस्थितांमध्ये एक विचारप्रवृत्त वातावरण निर्माण झालं. बच्चू कडूंचं हे भाषण केवळ मनोरंजकच नव्हे तर विचार करायला लावणारंही होतं.
बच्चू कडू यांची खासियत म्हणजे ते कोणत्याही मुद्द्यावर स्पष्ट बोलतात. लोकांना काय सांगायचं आहे, ते थेट सांगतात, आणि म्हणूनच त्यांच्या भाषणात मिश्किल शैली असली तरी ती एक आवाहनही असते की, आपण आपल्या समस्यांकडे दुर्लक्ष न करता त्यावर विचार करावा. त्यांच्या या शैलीत एकत्र आलेला विनोद, मिश्किलपणा आणि गंभीरता हे त्यांना राजकारणात एक वेगळं स्थान देतात.
राजकारणात प्रामाणिकपणे आणि हसतं मुखाने लढणारे नेते अगदीच कमी असतात, आणि बच्चू कडू त्यामधील एक आहेत. त्यांची ही निराळी शैली, जी सध्याच्या वातावरणात लोकांना हलकेफुलके क्षण देते, हेच लोकांसाठी प्रेरणादायी ठरतं.
